ការ​ដោត​​ទង់​ជាតិ​អប​អរ​ថ្ងៃ​បុណ្យ​ អ្នក​ខ្លះ​ធ្វើ​ដោយ​​ខ្ជី​ខ្ជា

ខេត្ត​កំពត ៖ នៅ​ក្នុង​ព្រះ​រាជ​ពិធី​​បុណ្យ​អុំ​ទូក​បណ្តែត​ប្រទីប អក​អំបុក ​និង​សំពះ​ព្រះ​ខែ គឺ​ជា​បុណ្យ​ប្រពៃណី​ជាតិ​ដ៏​ធំ​ និង​ពេញ​និយម​មួយ​នៃ​​​ព្រះ​រាជា​ណា​ចក្រ​​កម្ពុជា​ ដែល​មន្ត្រី​រាជ​ការ​គ្រប់​ស្ថាប័ន​ទាំង​​អស់​ត្រូវ​បាន​ឈប់​សំរាក​ដើម្បី​ ចូល​រួម​អប​អរ​សាទរ​​ក្នុង​ពិធី​បុណ្យ។ ​ក្នុង​នោះ​ការ​រៀប​ចំ​តុប​តែង​​លំអរ​នៅ​តាម​គេហ​ដ្ឋាន ​ទី​សាធា​រណៈ​ គេ​សង្កេត​ឃើញ​មាន​ការ​លំអរ​ដោយ​ទង់​ជាតិ​ ទង់​ជ្វាលា និងទង់​សាសនា គ្រប់​ទី​​អារាម​ទូទាំង​​ព្រះ​រាជា​ណា​ចក្រ​កម្ពុជា ។
សកម្ម​ភាព​នៃ​​ការ​រៀប​ចំ​តុប​តែង​នេះ ​អាជ្ញា​ធរ​គ្រប់​លំដាប់​ថ្នាក់​នៅ​ទូទាំង​ប្រទេស​ បាន​សហ​ការ​ជា​មួយ​សមត្ថ​កិច្ច​គ្រប់​មូល​ដ្ឋាន ការ​ពារ​សន្តិ​សុខ សណ្តាប់​ធ្នាប់ បង្ការ​ទប់​ស្កាត់​រាល់​បទ​ល្មើស​ផ្សេងៗ​ជូន​ប្រជា​ពល​រដ្ឋ​ក្នុង​ពិធី​ បុណ្យ​ដ៏​មហោ​ឡារិក​នេះ​ដែរ ។

ប្រជា​ពល​រដ្ឋ​ជា​អ្នក​រត់​ម៉ូតូ​​ឌុប​ជា​ច្រើន​នៅ​ ក្នុង​ផ្សារ​សាម​គ្គី​ ក្រុង​កំពត មាន​ការ​រិះ​គន់​មក​លើ​អាជ្ញា​ធរ​សង្កាត់​ក្រាំង​អំពិល ក្រុង​​កំពត ដែល​ខ្វះ​ការ​ប្រុង​ប្រយ័ត្ន​​​ក្នុង​ការ​ណែ​នាំ​ប្រជា​ពល​រដ្ឋ​ដែល​មាន​ ផ្ទះ​នៅ​ជាប់​ផ្លូវ​ជាតិ និង​ជា​កន្លែង​បង្ហាញ​ទិដ្ឋ​ភាព​ដល់​ភ្ញៀវ​​​ទេស​ចរ​​ជាតិ និង​អន្តរ​ជាតិ​​ដែល​ធ្វើ​ដំណើរ​ អ្នក​ខ្លះ​មើល​ឃើញ​ហើយ​​សើច​ អ្នក​ខ្លះ​​ទាញ​ម៉ាស៊ីន​ថត​ទុក​មើល​ទៀត​ផង ​ដោយ​ទិដ្ឋ​ភាព​ផ្ទះដែល​ដោត​ទង់​ជាតិ​បញ្ច្រាស​ក្បាល​ចុះ​ក្រោម​នេះ ជា​ផ្ទះ​លក់​សិប្ប​​ធ្វើ​​ថាំងទរ​ទឹក ពី​ស័ង្ក​សី ​ស្ថិត​ក្នុង​ភូមិ​ក្រាំង​អំពិល សង្កាត់​​ក្រាំង​អំពិល តាម​បណ្តោយ​ផ្លូវ​ជាតិ​​ភ្នំពេញ-កំពត ជិត​បេន​រថយន្ត​ចាស់ ។

ទាក់​ទិន​នឹង​ការ​ដាក់​ទង់​ជាតិ​ដាំ​ក្បាល​ចុះ​ក្រោម​ នេះ ​លោក​ស៊ី យុត ចៅ​សង្កាត់​ក្រាំង​អំពិល​បាន​ប្រាប់​កោះ​សន្តិ​ភាព​តាម​ទូរស័ព្ទ​ថា កាល​ពី​ថ្ងៃ​ទី ១៩ វិច្ឆិកា ឆ្នាំ​២០១០ លោក​បាន​ឱ្យ​កំលាំង​ប៉ូលិស​ប៉ុស្តិ៍​​នគរ​បាល ​ណែ​នាំ​ប្រជា​ពល​រដ្ឋ​​ឱ្យ​ដោត​ទង់​ជាតិ​គ្រប់​ផ្ទះ​ទៅ​ហើយ​ដែរ ​តែ​នៅ​ថ្ងៃ​ទី​២០ វិច្ឆិកា ឆ្នាំ​២០១០ លោក​ពុំ​ទាន់​បាន​ដើរ​ត្រួត​ពិនិត្យ​​មើល​ការ​ដោត​ទង់​ជាតិ​នៅ​តាម​ផ្ទះ​ របស់​ប្រជា​ពល​រដ្ឋ​​នៅ​ឡើយ​ទេ ​ដោយ​លោក​កំពុង​​រង់​ចាំ​កំលាំង​ប៉ូលិស​ចុះ ទៅ​ត្រួត​ពិនិត្យ​ទង់​តាម​ផ្ទះ​ជា​មួយ​គ្នា ៕