រថយន្តដឹកជ្រូក​បើក​ធ្លាក់​ផ្លូវ​​ចូលត្រាំ​ទឹក​ទាំព្រឹក

ខេត្តតា​កែវ​ ៖ រថយន្ត​កាមរី​ ស៊េរី​៨៧ ពណ៌​ប្រផេះ មួយគ្រឿង ​ពាក់ស្លាក​លេខ​ ឃ-១១០៥ ភព២ បានរេចង្កូត​ទៅប៉ះនឹង​​ដើម​ក្រសាំង ហើយ​ជ្រុលធ្លាក់​ផ្លូវ​ត្រាំទឹក កាល​ពី​វេលាម៉ោង​​៧​ព្រឹកថ្ងៃទី​២០ វិច្ឆិកា ២០១០ ​តាម​បណ្តោយ​ផ្លូវ​​​ជាតិលេខ​​២ ស្ថិត​ក្នុង​​​ភូមិ​ក្តុល ឃុំ​លំចង់ ស្រុក​សំរោង ខេត្តតាកែវ ​ប៉ុន្តែ​​ពុំ​បណ្តាល​ឱ្យ​​​មនុស្ស​ណា​ម្នាក់​​ស្លាប់ ឬ​រង​របួស​នោះទេ គ្រាន់តែ​​រថ​យន្ត​ខូចខាត​ធ្ងន់ ។

សាក្សី​ដែលឃើញហេតុការណ៍​​បាននិយាយ​ថា មុនពេលកើតហេតុ​​​រថយន្ត​​ខាងលើ​ដឹកជ្រូក​បាន​​បើកក្នុង​ល្បឿនលឿនលើ​កំណាត់​ ផ្លូវ​​ជាតិ​លេខ​​២ ពីទិស​​ខាង​ត្បូង​ទៅជើង ​ទំនងជា​ជ្រូក​នាំ​ចូល​​ពីប្រទេស​វៀតណាម ​បាន​ជា​គេ​បើក​លឿន ផ្តាច់ព្រលឹង​បែបនេះ ។ លុះ​មក​ដល់​ចំណុច​ខាង​លើ ស្ថិត​ក្នុង​ភូមិ​ក្តុល ឃុំ​លំ​ចង់ ស្រុក​សំរោង ​ស្រាប់តែ​​មានម៉ូតូ​មួយ​គ្រឿង បានបត់​ឆ្លង​ផ្លូវ​​ ធ្វើ​ឱ្យ​អ្នក​បើក​​រថយន្ត​​​បួង​ចង្កូត​គេ​ច​មក​ខាង​ឆ្វេង ប៉ះ​​​ដើម​ក្រសាំងនៅចិញ្ចើម​ផ្លូវ រួច​ជ្រុល​ក្បាល​ធ្លាក់​​ទឹកតែ​ម្តង​ ៕